Ang Pinoy Ako ay isang party-list na itinatag upang isulong at ipagtanggol angmga karapatan at kapakanan ng ating mga katutubong kababayan. Ngunit sa pagusad ng panahon, napansin natin na ang isyu ng hindi pagkakapantay-pantay ay hindi lamang nakakaapekto sa mga katutubo, kundi pati na rin sa iba’t ibang sector ng ating lipunan saanman sa bansa.

Dahil dito, pinalawak namin ang aming adbokasiya upang masusing tugunan ang mga suliranin ng diskriminasyon at hindi patas na pagtrato—hindi lamang para sa mga katutubo, kundi para sa lahat ng Pilipino, anuman ang kanilang sektor o katayuan sa buhay. Layunin ng Pinoy Ako na maging boses ng bawat Pilipinong nakararanas ng kawalan ng katarungan at itaguyod ang pagkakapantay-pantay sa lahat ng bahagi ng ating lipunan lalo na pagdating sa serbisyong pang-edukasyon, pangkalusugan, at pangkabuhayan.

Ang mga Katutubo, tulad nating lahat, ay hindi lamang mga pansamantalang benepisyaryo ng isang Proyektong Pang-Kawanggawa sapagkat sila ay mga taong may sariling karapatan at dignidad. Kailangan nila ng boses at isang malinaw na representasyon sa Kongreso na tunay na makakaunawa sa kanilang mga pangangailangan, at sa huli, makakatulong sa kanilang pagkamit ng karapatan sa sariling pagpapasya.

Kami ay naniniwala na ang bawat Pilipino ay may karapatang mapakinggan, maprotektahan, at mabigyan ng pantay na oportunidad. Sa Pinoy Ako, walang maiiwan! Sama-sama nating isusulong ang ating mga karapatan para sa isang makatarungan at pantay na lipunan.